Af væli

Pirringur Katrínar þykir mér eiga sér eðlilegar orsakir, þó vissulega séu upphlaup í ræðustól á Alþingi sjaldnast fólki til vegsauka. Ekki var málþóf þingmanna Sjálfstæðisflokksins þó heldur þeim til vegsauka.

Já, því málþóf var það, samkvæmt öllum eðlilegum viðmiðum.

Þetta er lagafrumvarpið sem var til þriðju umræðu í gærkvöldi, og sem kosið var um í morgun, laust fyrir hádegi (samkvæmt vef Alþingis sýnist mér svo vera; og að upphlaup Katrínar hafi þá orðið í morgun). Það snerist sumsé um breytingu á einni prósentutölu.

Eins og sjá má á Alþingisvefnum voru það einungis Sjálfstæðismenn og hinn Frjálslyndi Grétar Mar sem tóku til máls um frumvarpið í gærkvöldi, og þeir gerðu það oft og mikið. Á tímabilunum 19:00-19:21, 20:01-20:54, og 21:07-00:02 'ræddu' þingmenn Sjálfstæðisflokksins (og Grétar Mar stuttlega) þetta 'mjög svo mikilvæga' lagafrumvarp sín á milli í þaula, í töluðu máli jafnt sem söng.

Þessari 'umræðu' lauk síðan með því að frumvarpið var samþykkt samhljóða. Leiðinlegt nokk var söngfuglinn Árni hins vegar meðal fjarstaddra, og fékk því miður ekki færi á að tjá afstöðu sína til málsins með atkvæði sínu.

Maður hlýtur að spyrja að tilgangnum með þessum fíflaskap ...

„Hættið þessu helvítis væli"

Athugasemdir

[Þarfagreinir, 2.4.2009 kl. 17:20]

Fyrir mitt leyti snýst þetta ekki um að Árni hafi sungið í pontu. Hann má það vel mín vegna við og við ef hann er málefnalegur að öðru leyti. Nei, þetta er aðeins stærra en það.

Annars rakst ég á ræðu Sigurðar Kára Kristjánssonar í annarri umræðu um málið, þar sem hann segir í lokin:

Það liggur því fyrir, herra forseti, að ég er ánægður með málið, ég styð það og hef áhuga á því. Ég vona að það verði samþykkt bæði hratt og vel frá þinginu og það verði góðar fréttir fyrir kvikmyndaiðnaðinn á Íslandi.

Sigurður Kári var einn þeirra sem tók þátt í málþófinu í þriðju umræðu; tók til máls alls fjórum sinnum. Því miður liggur reyndar ekki enn fyrir skriflega hvað hann hafði þar til málanna að leggja - en hvað sem því líður er þetta varla til þess fallið að tryggja hraða og góða samþykkt á málinu ...

[Sigurjón, 2.4.2009 kl. 21:38]

Merkilegt.

Hér á árum áður, þegar vg talaði út í eitt, voru Sjálfstæðismenn sakaðir um að ,,keyra mál umræðulaust í gegnum þingið" þegar þeir kvörtuðu yfir málþófi téðra vitlausu grænna.

Merkilegt...

[Þarfagreinir, 2.4.2009 kl. 23:42]

Rétt er það, enda hef ég hvergi mælt slíku hátterni bót. Menn ættu að vera sjálfum sér samkvæmir í þessu sem öðru. Verst finnst mér í þessu tilfelli að maður sér suma Sjálfstæðismenn neita því að þarna hafi verið um málþóf að ræða. Það þykir mér með öllu óskiljanlegt.

[Sigurjón, 3.4.2009 kl. 01:23]

Já, þetta kallazt auðvitað málþóf.  Það er engum blöðum um það að fletta.  Það finnst mér ekki Sjálfstæðismönnum til framdráttar...

[Offari, 4.4.2009 kl. 18:25]

Mér finnst alltaf betra að ræða málin áður en við hengjum.

[Hilmar Gunnlaugsson, 5.4.2009 kl. 20:36]

Ég tel að Katrín ætti að vanda betur orðaval sitt en blót er með öllu óviðeigandi á Alþingi.