Borgarmálin

Það er ekki laust við að maður sé hálforðlaus yfir þeim.

Fátt kemur manni orðið á óvart þegar þau eru annars vegar.

Það er nokkuð ljóst að eitthvað mjög mikið er að hér í höfuðborginni. Þeir sem ekki sjá það eru með hausnum í sandinum. Ég tel afskaplega ólíklegt að þessi nýjasti meirihluti muni lægja einhverjar öldur - því miður.

Staðreyndin er nefnilega sú að þrátt fyrir fögur fyrirheit, vandlætingafullar yfirlýsingar og gífuryrði, þá byggðist síðasti meirihluti á sandi. Hann var myndaður í skyndi vegna þess að Sjálfstæðismenn gátu ekki unað því að hafa misst völdin í Reykjavík. Þeim lá það mikið á að komast aftur til valda að þeir voru tilbúnir til að gera nánast hvað sem er. Ég á alla vega afskaplega erfitt með að meta þetta öðruvísi.

Það þurfti stórkostlegt dómgreindarleysi til að sjá það ekki fyrir að þessi meirihluti myndi einskis stuðnings njóta meðal borgarbúa - en dómgreindin brást, og því fór sem fór.

Mun skynsamlegra hefði fyrir Sjálfstæðisflokkinn í Reykjavík að bíða Tjarnarkvartettinn af sér og eyða orkunni í að styrkja sín innri mál. Leita færis í kosningum, eða jafnvel þegar hrikta færi undan stoðum Tjarnarkvartettisins af einhverri alvöru. Fyrst hann var svona ömurlegur og óstarftækur (að sögn Sjálfstæðismanna), hvað hefði verið að því að bíða þess að hann eyðilegðist innan frá?

Eftir stendur að Sjálfstæðismenn í Reykjavík sprengdu utan frá meirihluta sem naut stuðnings góðs meirihluta borgarbúa, og fékk ekki nema nokkra mánuði til að sanna sig. Í stað hans stofnuðu þeir meirihluta sem naut stuðnings góðs minnihluta borgarbúa, fékk rýmri tíma til að sanna sig, og var sprengdur innan frá, af öðrum aðila hans.

Ég tel að auðvelt ætti að vera að átta sig á muninum á þessu tvennu. Bull um að hvaða meirihluti sem er sé boðlegur, svo lengi sem hann hafi tæknilegan meirihluta borgarfulltúa að baki, er ekkert annað móðgun við heilbrigða skynsemi. Vonandi hafa einhverjir nú lært þá lexíu.

Það er einnig vonandi að þessi nýji meirihluti verði farsæll - borgin má einfaldlega ekki við frekara rugli. Raunsæið segir hins vegar að það sé líklega borin von.

Einungis nýjar kosningar eru hugsanlega til þess fallnar að koma einhverju skikki á Ráðhúsið. Verst að það er svo fjári langt í þær ...