En byltingarkennt

21.3.2007 | 11:11

Það er sumsé í alvöru mat Sjálfstæðismanna í Reykjavík að ein besta leiðin til að auka tekjur borgarsjóðs er að fjölga borgarbúum! Ég man að þeir spiluðu stöðugt þá plötu þegar Reykjavíkurlistinn var við völd að það væri gríðarlegt vandamál að fólk væri að flytja frá Reykjavík yfir í nærliggjandi byggðir. Ég hélt alltaf að þetta væri einungis orðagjálfur í þeim tilgangi að koma ódýru höggi á Reykjavíkurlistann. Nú er hins vegar ljóst að full alvara var þarna að baki. Hin byltingarkennda lausn Sjálfstæðismanna er sumsé einfaldlega að fjölga borgarbúum. Hvílík snilld.

Nú hef ég bara eina spurningu: Er virkilega skortur á fólki sem vill flytja til Reykjavíkur? Það kemur meira að segja fram í fréttinni að borgarstjóra er fullkunnugt að borgarbúum fjölgar! "Vandinn" er bara sá, að mati hans og félaga hans, að þeim fjölgar hægar, hlutfallslega, en íbúum til að mynda Kópavogs og Hafnarfjarðar. Æ, æ. En hræðilegt. Við verðum að fjölgja Reykvíkingum hraðar! Skiptir engu þó að samanburðurinn sé hlutfallslegur; það er prósentutalan sem gildir! Ef Kópavogsbúum fjölgar um 1% verður Reykvíkingum að fjölga um 1% líka! Heiður Reykvíkinga er í veði!

Að hinni rakalausu þvælu að miða við prósentutölur slepptri, þá verð ég að leyfa mér að setja fram efasemdir um að fjölgun borgarbúa sé einhver töfraformúla. Hvað með kostnaðinn að baki hverjum íbúa? Ég hefði haldið að hann myndi vega aðeins upp á móti auknum tekjum; að línulegt samband væri milli tekna og útgjalda hjá borginni. Eða er það virkilega svo að Reykvíkingar borga meira í opinbera sjóði en þeir fá til baka? Ef svo er þá vil ég fá eitthvað af þessu til baka, takk!