Bull er þetta

Hvað ef Ungir jafnaðarmenn eru sammála stefnu flokksins að flestu, eða alla vega mörgu öðru leyti? Hvað ef þeim finnst Samfylkingin endurspegla sín sjónarmið hvað best allra flokka? Hvert eiga þeir þá að fara?

Einhvern flokk verður maður víst að styðja í þessu blessaða flokkakerfi (vilji maður vera pólitískt þenkjandi á annað borð), jafnvel þó maður sé ekki sammála öllu því sem forystan gerir. Þessi kvöð felur þó ekki í sér skilyrðislausa og heilalausa flokkshollustu.

Það er jákvætt að standa á sínu og gagnrýna það sem manni mislíkar. Það er sérstaklega til marks um sterkan karakter að geta gagnrýnt þá sem standa manni næst.

Ég hef til að mynda alltaf að vissu leyti dáðst að SUS, sem oft hefur gefið út yfirlýsingar þar sem forysta Sjálfstæðisflokksins er gagnrýnd, og ýtt er á hana að fara eftir þeirri stefnu sem SUS hefur markað sér. Nú hafa Ungir jafnaðarmenn sýnt að þeir hafa álíka hörð bein í sínum nefum - og það er virðingarvert.

Þessi yfirlýsing UVG er lítið annað en barnaleg stríðni - "Akkuru fariði ekki bara eitthvað annað ef þið eruð ósáttir?"

Betra hefði að mínu mati farið á því að fagna þessari yfirlýsingu Ungra jafnaðarmanna og skora á forystu Samfylkingarinnar að hlusta á unga fólkið sitt. Það hefði verið mun sterkari leikur, og mun betur til þess fallinn að vekja athygli á málstaðnum, en ekki grunnhyggnu karpi á milli flokka.

Þessi bullmálflutningur Vinstri grænna minnir mig annars um margt á þá sem hæddust að dómnefndinni sem gagnrýndi skipun Þorsteins Davíðssonar vegna þess að "hún sagði ekki af sér", í stað þess að svara því sem hún hafði fram að færa  ... og það þykir mér uggvænlegt.

Besta gagnrýnin kemur að innan. Þannig hefur það alltaf verið.

Ungir jafnaðarmenn segi sig úr Samfylkingunni

Athugasemdir

[Valsól 29.6.2008 kl. 22:37]

Góður pistill og ég er algjörlega sammála þér. Það er hins vegar sorglegt að Sjálfstæðismenn þeir detta voðalega oft í það að lepja upp eftir einhverjum háttsettum og svo þylja allir upp sömu vitleysuna. T.d þega Árni Matt hafði ráðið son Davíðs í vinnu, þá biðu allir eftir yfirlýsingu frá Árna og svo þegar hún var komin þá bbyrjaði ballið. Fyrstur til að hefja upp raust sína var Óli Björn Kárason í Kastljósi sjónvarpsins. Þar varði hann ráðninguna og elti sömu orðin og sömu varnirnar og Árni Matt hafði fyrr um daginn gefið út. Það vita allir að þetta var óheiðarleg mannaráðning en samt sjá þessir menn sig knúna til að verja ósómann. Þetta er munurinn á okkur og svo Sjálfstæðismönnum. Þeir eru í liði en við gagnrýnum okkar menn ef okkur líkar ekki. Reyndar er eins og þú segir, þá hafa SuSarar gagnrýnt forystuna nokkrum sinnum, og er það vel. En því miður hefur það verið þannig að um leið og smjörklýpan hefur farið af stað þá koma skósveinar Sjálfstæðisflokksins og verja gjörningana sem toppar flokksins hafa framið.

[Þarfagreinir, 29.6.2008 kl. 23:06]

Hárrétt hjá þér - í sumum málum er eins og alls ekki megi gagnrýna forystu Sjálfstæðisflokksins, og áróðursmaskínan fer þess í stað gang. Ég fylgdist ágætlega með umræðunni um þessa dómaraskipun, og tók einmitt vel eftir því hvernig bullið lak niður á við, og hversu mörgum var mjög svo í mun að verja vitleysuna með öllum mögulegum ráðum. Það var vægast sagt ömurlegt að horfa upp á þetta - en maður hefur nú svosem séð þetta gerast við fleiri tækifæri, því miður. Þetta er eitt versta meinið í þeim flokki, þó þau séu nokkur fleiri. Ég held að þetta stafi alla vega að hluta til af því að hann hefur verið of lengi við völd - flokksmenn eru orðnir vanir því að ráða, og finnst að þeir eigi einfaldlega að fá að ráða, án einhverrar leiðinlegrar gagnrýni og aðhalds.

Svona í grófum dráttum þá er ég sammála því að fólk vinstra megin við miðjuna er gjarnara á að hugsa sjálfstætt og tala út frá eigin hjarta, frekar en að bara verja sitt lið. Á þessu eru vitaskuld undantekningar - Sjálfstæðismaðurinn Jón Valur Jensson stóð sig til að mynda mjög vel í baráttunni gegn spillingunni í þessu tilfelli.

En varðandi þessi blessuðu álver, þá er ég annars sammála UJ. Forysta flokksins hefur brugðist, og ég vona að horfið verði af þessari leið hið snarasta.